Framkvæmdastjóraskipti hjá PGA á Íslandi

 

pga framkvæmdastjóraskiptiUndanfarin ár hafa PGA samtökin eflst og dafnað svo um munar og eru félagsmenn nú orðnir um 70 talsins. Í ljósi aukins umfangs var orðið nauðsynlegt að ráða inn starfsmann til að sinna öllum þeim fjölda verkefna sem félagið hefur á sínum höndum. Agnar Már Jónsson sem hefur sinnt framkvæmdastjórastarfinu undanfarin 8 ár hefur ákveðið að láta af störfum og í stað hans hefur Andrea Ásgrímsdóttir verið ráðin í starfið.

„Við erum gríðalega ánægð með að þessa ráðningu og aukið samstarf við GSÍ. PGA á Íslandi ætlar sér stóra hluti í framtíðinni. Helstu verkefni á þessu ári er „PGA junior golf“ sem fer á stað í júní, stelpugolfdagurinn, sem hefur slegið í gegn síðustu árin, endurmenntun golfkennara og halda úti metnaðarfullum PGA golfkennaraskóla með hæstu viðurkenningu frá PGA Europe. Andrea hefur mikla reynslu úr golfíþróttinni, hún er menntaður PGA kennari, og það er mikilvægur þáttur í því að leiða öll þessi verkefni. Ég vil fyrir hönd PGA á Íslandi þakka Agnari Má Jónssyni, fyrir frábært starf á undanförnum árum sem framkvæmdastjóri PGA á Íslandi. Með hans aðstoð og fjölda annarra náðist að lyfta starfi PGA á Íslandi á hærri stall“ sagði Hlynur Geir Hjartarson formaður PGA á Íslandi.

“Undanfarin ár hafa verið virkilega skemmtileg og gefandi og það hefur verið heiður að starfa með því frábæra fólki sem stendur að PGA samtökunum.” Segir Agnar Már sem jafnframt er framkvæmdastjóri GKG og mun nú einbeita sér af krafti við innleiðingu á íþróttamiðstöð klúbbsins. “Ég lít á þetta sem frábært tækifæri til að starfa allt árið í umhverfi sem ég hef verið tengd í tugi ára og er spennt fyrir verkefnum komandi tíma.” segir Andrea en auk þess að vera PGA golfkennari hefur Andrea framhaldsmenntun í markaðs- og kynningarmálum og hefur starfað undanfarið á þeim vettvangi, þ.e. að markaðs-, kynningar- og viðburðamálum.

This entry was posted in PGA. Bookmark the permalink.

Comments are closed.