PGA á Íslandi

Aðalfundur PGA á Íslandi fór fram sunnudaginn 9. febrúar í íþróttamiðstöð GKG og voru 30 félagsmenn mættir til fundarins. Hápunktur dagsins var áhugarverður fyrirlestur frá Dr. Matt Bridge sem er með PhD gráðu í íþróttavísindum frá Birmingham University og hefur starfað við golfþjálfun síðan 2003. Hann hefur haldið fyrirlestra og námskeið fyrir leikmenn og þjálfara víðs vegar um heiminn. Hin árlega púttkeppni var á sínum stað, leiknar voru 9 holur á Leirdalsvelli í golfhermum GKG og að lokum snæddu félagsmenn saman um kvöldið og skemmtu sér vel.

Á sjálfum aðalfundinum fór Sigurpáll Geir Sveinsson, formaður PGA á Íslandi, yfir skýrslu stjórnar. Ólafur Björn Loftsson, framkvæmdastjóri félagsins, fór yfir reikninga félagsins og kynnti fjárhagsáætlun ársins. Fimm PGA meðlimir gáfu kost á sér í stjórn félagsins og hlutu þau Ástrós Arnarsdóttir, Birgir Vestmar Björnsson, Dagur Ebenezersson og Sigurpáll Geir Sveinsson stjórnarkosningu til tveggja ára. Arnar Már Ólafsson, Birgir Leifur Hafþórsson, Karl Ómar Karlsson og Sturla Höskuldsson voru kosin fyrir ári síðan til tveggja ára og mynda þessir átta PGA meðlimir því stjórn félagsins árið 2020. Derrick Moore, Hulda Birna Baldursdóttir og Snorri Páll Ólafsson gáfu ekki kost á sér til áframhaldandi stjórnarsetu og vill PGA á Íslandi koma á framfæri þökkum til þeirra fyrir frábært starf á liðnum árum.

Samkvæmt lögum félagsins velur nýkjörin stjórn formann úr sínum röðum. Á fyrsta stjórnarfundi nú á dögunum ákvað Sigurpáll Geir Sveinsson, sem hefur verið formaður félagsins síðustu tvö ár, að stíga til hliðar. Birgir Leifur Hafþórsson gaf kost á sér að taka við af Sigurpáli og var samþykktur af stjórn sem formaður félagsins.

Eftirfarandi verðlaun voru veitt á aðalfundardeginum fyrir árið 2019:

Kennari ársins: Arnar Már Ólafsson

Kylfingur ársins: Guðmundur Ágúst Kristjánsson (valið af matsnefnd PGA)

Meistari ársins: Guðmundur Ágúst Kristjánsson (lægsta skor atvinnukylfings í Íslandsmótinu í höggleik)

Aðalfundur PGA á Íslandi fór fram laugardaginn 3. febrúar í íþróttamiðstöð GKG og voru 30 félagsmenn mættir til fundarins. Að venju var glæsileg dagskrá í kringum fundinn. Á meðal fyrirlesara voru Guðjón Grétar Daníelsson sem hóf daginn með áhugarverðri vinnustofu frá Dale Carnegie. Magnús Lárusson kynnti nýjan samstarfssamning milli PGA á Íslandi og ÍSAM Golf. Hörður Geirsson kynnti nýju golfreglubreytingarnar fyrir félagsmönnum og Agnar Már Jónsson stýrði að lokum umræðum varðandi starfsumhverfi golfkennara á Íslandi. Að auki fór fram hin árlega púttkeppni og að lokum snæddu félagsmenn saman um kvöldið og skemmtu sér konunglega þar sem Vernharð Þorleifsson, veislustjóri, fór á kostum.

Á sjálfum aðalfundinum fór Sigurpáll Geir Sveinsson, formaður PGA á Íslandi, yfir skýrslu stjórnar. Ólafur Björn Loftsson, framkvæmdastjóri félagsins, fór yfir reikninga félagsins og kynnti fjárhagsáætlun ársins. Arnar Már Ólafsson, Birgir Leifur Hafþórsson, Karl Ómar Karlsson og Sturla Höskuldsson hlutu stjórnarkosningu til tveggja ára. Derrick Moore, Hulda Birna Baldursdóttir, Sigurpáll Geir Sveinsson og Snorri Páll Ólafsson voru kosin fyrir ári síðan til tveggja ára.

Um kvöldið voru veitt eftirfarandi verðlaun fyrir árangur árið 2018:

Kennari ársins: David Barnwell

Kylfingur ársins: Valdís Þóra Jónsdóttir (Karl Ómar Karlsson, þjálfari Valdísar, tók við verðlaununum fyrir hennar hönd)

Meistari ársins: Axel Bóasson (Björgvin Sigurbergsson, þjálfari Axels, tók við verðlaununum fyrir hans hönd)

Fremsta röð frá vinstri: Írena Ásdís Óskarsdóttir, Hallsteinn Traustason, Guðjón Grétar Daníelsson, Grétar Eiríksson, Axel Bóasson, Magnús Birgisson (PGA kennari)
Miðjuröð frá vinstri: Sturla Höskuldsson (PGA kennari), Dagur Ebenezersson, Jón Andri Finnsson, Ólafur Björn Loftsson, Birgir Vestmar Björnsson, Ástrós Arnarsdóttir, Stefanía Kristín Valgeirsdóttir.
Aftasta röð frá vinstri: Guðmundur Daníelsson, Þorlákur Grímur Halldórsson, Rafn Stefán Rafnsson, Gunnar Geir Gústafsson, Ari Magnússon, Margeir Vilhjálmsson Á myndina vantar: Steinn Baugur Gunnarsson, Brynjar Örn Rúnarsson

Það var líf og fjör í Hraunkoti í Hafnarfirði á dögunum þar sem fullorðið fólk lék sér eins og börn með bros á vör. Þar stóð yfir kennslustund í Golfkennaraskóla PGA á Íslandi. PGA-kennarnir Magnús Birgisson og Sturla Höskuldsson sáu um kennslustundina þar sem nemendurnir skemmtu sér vel í SNAG golfleikjafræðum.

Alls eru 19 nemendur skráðir í PGA-námið að þessu sinni og aldrei áður hafa jafnmargir nemendur verið í skólanum á sama tíma.

Þetta er fimmti árgangur Golfkennaraskóla PGA á á Íslandi en námið tekur alls þrjú ár.

Í ár eru 10 ár frá því að fyrstu nemendur í Golfkennaraskóla PGA á Íslandi útskrifuðust.

„Það ríkir mikil eftirvænting hjá okkur í PGA á Íslandi varðandi námið í ár. Liðin eru þrjú ár frá því að síðasti kennarahópurinn útskrifaðist,“ segir Ólafur Björn Loftsson framkvæmdastjóri PGA á Íslandi en hann er einn af þeim 19 sem eru í PGA-náminu núna.

Ólafur segir að PGA á Íslandi hafi lagt mikla vinnu í það á undanförnum misserum að uppfæra kennsluskrá sína til þess að uppfylla kröfur PGA í Evrópu um golfkennaranám.

„Það þarf að vinna eftir þeirra stöðlum í ákveðnum þáttum námsins. Með þessum hætti er verið að tryggja að skólinn öðlist alþjóðlega viðurkenningu sem uppfyllir allar kröfur sem endurspegla þarfir golfmarkaðarins,“ segir Ólafur Björn.

Eins og áður segir eru 19 nemendur eru skráðir í skólann og er fyrsta önnin hálfnuð en námið tekur 3 ár. Þetta er stærsti árgangur frá upphafi skólans og ríkir góð stemning í hópnum á meðal nemenda og kennara. Það eru frábær tíðindi fyrir framþróun golfíþróttarinnar að PGA menntuðum golfkennurum á Íslandi haldi áfram að fjölga.

GKG auglýsir eftir afreksþjálfara frá 1. janúar 2019. Afreksþjálfari gegnir lykilhlutverki í starfi klúbbsins og hefur yfirumsjón með skipulagi, þjálfun og samskiptum við afrekskylfinga í klúbbnum.

Menntunar- og hæfniskröfur:

• Reynsla af afreksþjálfun

• Viðurkennt PGA golfkennaranám

• Leiðtogahæfni, frumkvæði og sjálfstæði í vinnubrögðum

• Geta tjáð sig í ræðu og riti

• Jákvæðni, þjónustulund og hæfni í mannlegum samskiptum

Um er að ræða 50-100% starf. Umsóknum skal fylgja greinargóð ferilskrá umsækjenda. Senda skal umsóknir fyrir 1. nóvember á netfangið ulfar@gkg.is.

Nánari upplýsingar um starfið veitir íþróttastjóri GKG í síma 862 9204 og á netfanginu ulfar@gkg.is.

GKG is hiring an elite coach from 1st January 2019. The elite coach is a key member in the club´s daily functions and is in charge of organizing and training the elite players in the club.

Education and other requirements:

• Accredited PGA education

• Experience with elite coaching

• Strong leadership and organizational skills

• Strong written and verbal skills

• Positive outlook and ability to work well with others

The job will be 50-100%, depending on the individual and how tasks will be allocated. Please send detailed CV´s before 1st November to ulfar@gkg.is.
More details about the job will be given by Úlfar Jónsson at 862 9204 and/or ulfar@gkg.is

Golfkennaraskólinn hefst í haust og lýkur að vori 2021. Kennt verður eftir nýju kerfi (European Education Level System) sem hefur verið þróað í nokkur ár af PGA í Evrópu. Námið byggist á þrem þáttum:

•      Kennsla og þjálfun (Teaching and Coaching)
•      Golfleikurinn (The Game)
•      Iðnaðurinn (The Industry)

Hér má finna námsskrá EELS 

Inntökuskilyrði:

• Umsækjendur þurfa að hafa náð 18 ára aldri og geta lesið og skrifað á ensku
• Hámarksforgjöf nemenda er 5,4 fyrir karla og 8,4 fyrir konur
• Nemendur þurfa að standast spilahæfni PGA golfkennaraskólans (Playing Ability Test). Krafa er gerð að leika tvo hringi í röð á hámark samtals 15 (karlar) eða 20 (konur) yfir SSS vallar, leikið af hvítum (karlar) eða bláum (konur) teigum á mótum samþykktum af skólanefnd PGA (t.d. Eimskipsmótaröðinni).

Námið er þriggja ára lotunám, það hefst í október 2018 og lýkur í maí 2021. Kennt verður í fjórum lotum á önn og fer kennslan ávallt fram föstudegi til sunnudags.

Verð: 1.470.000 (490.000 kr. á ári)

Umsóknarfrestur er til 30. september. Umsókn má finna hér: https://docs.google.com/forms/d/10silkDbBf2tvd-adrkHT0uLgqnk9sSBWex6kn50n9Lw/viewform?edit_requested=true

Nánari upplýsingar er hægt að nálgast hjá Ólafi Birni Loftssyni, framkvæmdastjóra PGA á Íslandi, í gegnum netfangið olafur@pga.is

PGA er alþjóðlegt vörumerki sem stendur fyrir Professional Golfers Association. Námið sem PGA golfkennaraskólinn á Íslandi býður upp á er viðurkennt af PGA í Evrópu og gefur alþjóðleg réttindi.