PGA á Íslandi

Leiðbeinendanámskeið á vegum PGA á Íslandi í samstarfi við GSÍ fór fram helgina 12.-13. maí á Korpúlfsstöðum. Átján áhugasamir kylfingar tóku þátt en námskeiðið var ætlað öllum þeim sem hafa áhuga á að leiðbeina börnum, unglingum og byrjendum í golfi.

Laugardagurinn hófst með frábærum fyrirlestri frá Gunnari Hanssyni leikara en hann fór yfir framkomu á skemmtilegan og fróðlegan máta. Sturla Höskuldsson og Snorri Páll Ólafsson PGA kennarar tóku þá við og sáu um kennsluna báða dagana. Þeir fóru meðal annars yfir öryggisatriði við þjálfun, grunnatriði og tækni golfsveiflunnar og yfirferð á kennslu golfreglna og golfsiða. Mesta áherslan var þó lögð á gerð tímaseðla fyrir æfingar og framkvæmd þeirra æfinga. Þá var skipt upp í hópa þar sem þátttakendur skipulögðu og framkvæmdu æfingu annars vegar fyrir börn og hins vegar fyrir byrjendur. Snorri og Sturla fylgdust vel með og komu með uppbyggilega gagnrýni og ráðleggingar í lok dags.

Námskeiðið gekk mjög vel og það ríkti mikil ánægja bæði meðal kennara og nemenda. PGA á Íslandi vill þakka öllum þeim sem hjálpuðu við að koma þessum viðburði á framfæri og þá sérstaklega þeim sem sáu sér fært um að taka þátt í helginni með okkur. Stefnt er að því að halda annað leiðbeinendanámskeið næsta vetur og gera enn betur.

Skráning hér

Aðalfundur PGA á Íslandi fór fram laugardaginn 3. febrúar í íþróttamiðstöð GKG og voru 25 félagsmenn mættir til fundarins. Að venju var glæsileg dagskrá í kringum fundinn. Tómas Aðalsteinsson hóf daginn með fyrirlestri um hugarþjálfun kylfinga og eftir aðalfundinn fóru fram umræður um afreksgolf á hæsta stigi. Að auki fór fram hin árlega púttkeppni og að lokum snæddu félagsmenn saman um kvöldið.

Á sjálfum aðalfundinum fór Karl Ómar Karlsson, formaður PGA á Íslandi, yfir skýrslu stjórnar. Ólafur Björn Loftsson, framkvæmdastjóri félagsins, fór yfir reikninga félagsins og kynnti fjárhagsáætlun ársins. Áhugaverðar umræður fóru fram um hin ýmsu mál tengd starfseminni. Derrick Moore, Hulda Birna Baldursdóttir, Sigurpáll Geir Sveinsson og Snorri Páll Ólafsson hlutu kosningu meðstjórnanda til tveggja ára. Birgir Leifur Hafþórsson, Karl Ómar Karlsson, Nökkvi Gunnarsson og Sturla Höskuldsson voru kosnir fyrir ári síðan til tveggja ára. Agnar Már Jónsson og Helgi Anton Eiríksson gáfu ekki kost á sér til áframhaldandi stjórnarsetu. Hlynur Geir Hjartarson hafði dregið sig úr stjórn snemma á síðasta ári vegna anna.

Í lok fundar voru eftirfarandi verðlaun veitt fyrir árangur á árinu 2017.

Kylfingur ársins: Ólafía Þórunn Kristinsdóttir

PGA meistari ársins: Axel Bóasson

PGA kennari ársins: Derrick Moore